ivanliresearch
patreon
［減息，一樣係買股票］（二）—買樓可以，但唔係「因為」減息。做定期更加唔係好主意。下年你點算？
🕑 Added 2023-11-27 11:03:28 +0000 UTC買債都仲可以討論下。但減息做定期，減息買樓，就真係唔係好主意
我從來都唔覺得香港樓市同息口好有關係。
即使美好年代，港樓升幅都係不及港股。但點解啲人買樓上流多？
唔係喎，呢幾年加息，港樓係咁跌喎 — 但係因果，定巧合？
你可以買樓，但唔係「因為」減息
做定期，亦唔係好主意。係，舊年你跑贏。但之前十幾廿年呢？以後呢？
我當你而家做到5%定期都好，但下年呢？到時又點？
做定期，upside cap咗。啲人平時覺得股票10%年都唔夠喎。仲做定期？
買股票指數係咪冇發達呢？「視乎幾多錢叫發債」。但做定期肯定冇上游
買股票，1萬蚊都做到10%。你做定期，細銀碼就做唔到5%啦？
買債都仲可以討論下。但減息做定期，減息買樓，就真係唔係好主意
1. 呢篇唔長，減息買乜？我話買股票，有人未必同意，覺得應該買樓，做定期，或者有人覺得應該買債。今篇同你踢走「買樓」同「做定期」呢兩個選項先。買債，亦唔係好主意，但值得之後用多啲篇幅討論。
2. 請你務必睇上篇文，排球S隊B隊嘅故事，以及嗰個「煙傾女積十」嘅故事。冇心機睇，或者睇咗都唔明嘅，咁我畀結論你：幾時，都係100%股票，除非你差不多退休（但退休都應該有60%股票）
3. 照舊，鍾意嘅可以睇信報文，冇心機嘅我呢度亦會講
4. 債息跌，炒減息，買乜好？最直覺嘅想法，可能係買債啦，畢竟債息跌即係債價升，一體兩面。又或者，做定期鎖定回報啦。又或者，買樓啦。
5. 以上種種，不能話錯，但我唔覺得係好嘅選擇。
我從來都唔覺得香港樓市同息口好有關係。
6. 首先講買樓。同好多人印象唔同，至少金融學院派話你知，買樓唔係好嘅投資。固然，「金融學院派」係鬼佬，外國樓投資價值多數唔高，好多人都知。不過，即使香港（或者東亞）樓市之前造就咁多人上流，係時代偶然，定會重覆？
即使美好年代，港樓升幅都係不及港股。但點解啲人買樓上流多？
7. 況且，都寫過好多次，即使美好年代，你睇之前咁多年港樓升幅，其實並冇好過港股。但你見啲人買樓上流，買股票好少。原因三大個：首先，買樓個個做槓杆，股票做唔到。第二，買樓銀碼大，多數人買股票就只係「飲餐茶」。第三，買樓坐得長，股票啲人兩嘢「食糊」
8. Practically，你五十年前買層太古城，可以坐到而家。但你唔會五十年前100點買恒指坐到而家的（實數不深究，明我講嘅意思啦）。
9. 相信隨住樓市回調，而家大家睇香港樓市又淡咗好多，好典型嘅「只係睇呢幾年」，「只係睇身邊人點講」。香港樓之後點，我不打算討論，你地個個都專家
10. 但我只想講一樣嘢：從來，我都唔覺得樓價同息口有乜好大關係。你可以講乜嘢供樓負擔租金回報之類，但你睇香港嘅情況，明顯呢個因素只係佔好細部份。
唔係喎，呢幾年加息，港樓係咁跌喎 — 但係因果，定巧合？
11. 唔係喎，呢排加息，樓價係咁跌喎 — 呢個係特別例子，定一直係咁？好簡單，你睇以前無論加息減息，香港樓都係照升，明顯同息口關係好低。
12. 真正影響樓價嘅，係人口。早年可能因為香港人由窮變有錢要改善生活環境，人口亦增長，後來就係大陸人買樓。咁呢幾年就移民潮好多人走，大陸人又少咗嚟買（有辣稅，況且可能冇以前咁富貴，要買嘅亦可能買咗，又或者驚香港都唔安全，乜都好），鬼佬又少咗嚟。明顯係呢啲因素，而唔係息口。
你可以買樓，但唔係「因為」減息
13. 無論如何，就真係唔好諗因為減息買樓。買就買，唔買就唔買，同息口關係真係唔係太大。
做定期，亦唔係好主意。係，舊年你跑贏。但之前十幾廿年呢？以後呢？
14. 至於做定期存款，亦係搵笨。冇錯，舊年股市香晒，你做定存，當然係跑贏大市。但同排球隊比喻一樣，做定期，長遠一定係跑輸股票的。你舊年賺到5瓼息，但今年呢？美股一個月都升10%，拉勻全年可能有20%。我買「全餐」，馬騮掟飛標47個股市任揀，今年都升7%啦。
15. 況且，我當你而家做到5%定期，但下年呢？介紹返，呢個系列大家都係同意，之後會減息嘛。好啦，之後你嘅定期，可能得返3%息？可能再下年係零息？咁點？
我當你而家做到5%定期都好，但下年呢？到時又點？
16. 最麻煩係，如果到時股票升咗呢？你買落去，又怕摸頂。唔買？又一路跑輸。
17. 所以都係好簡單，做定期，好難長期跑羸通脹，更加好難長期跑贏股票。你睇舊年5%，叻過買股票，係十分短視。之前N咁多年零息呢？然後美股升咗幾多倍？
18. 呢種謬誤，以前都寫過，亦係你睇好多文會出現嘅問題：Framing．你要框到某啲位，某啲嘢跑贏，不難。但真正「好」嘅投資，就係「我任你點框都跑贏」。過去幾十年，你睇股市，我當你求其拎兩個點出嚟，多數都係跑贏晒其他嘢的 — 咁你不能講「2020年嗰個月美股跌三成呀，我放錢在曲奇餅罐唔使輸—雖然呢個係事實，但你不能拎呢樣嘢，去認為打後幾十年你個曲奇餅罐會跑贏。
19. 做定期嘅，你不如去買債券算，都真係可以4.5厘鎖十幾年。但值唔值得咁做，另一回事，之後討論
做定期，upside cap咗。啲人平時覺得股票10%年都唔夠喎。仲做定期？
20. 況且，做定期嘅嘢，Upside已經cap咗。直接啲講，肯定唔會上流到。發唔發現好奇怪？我同你講，股票一年10%或者12%，唔少人會失望，咁死啦，發唔到達喎。
買股票指數係咪冇發達呢？「視乎幾多錢叫發債」。但做定期肯定冇上游
21. 關於「買股票指數係咪冇發達」呢個問題，以前整過個Excel，你可以計下數（attach埋畀你）。但首先，當然睇你咩叫「發達」。咁Practically，正常人嘅人工，個個月供美股，你唔會變李嘉誠。但你話去到提早退休，衣食無憂財務自由，就仲係 realistic
22. 但我想個重點係：見唔見到個矛盾？一年10%或12%，你都覺得「唔夠」— 咁你做定期，當然係死路一條啦。實數難計，但你可以計下，做定期，一年平均有幾多%回報？你可以搵資料。但我估，可能只係3% — 記住你唔好只拎呢兩年嘅數，之前N咁多年零息你又唔計？當然你可以拎埋90年代高息嚟比。但拉勻晒，我估可能只係3% - 然後，都未扣通脹。死得啦。
買股票，1萬蚊都做到10%。你做定期，細銀碼就做唔到5%啦？
23. 更何況，做定期仲有個好大嘅問題：銀碼。我唔係完全肯定，但怕且你去存1萬蚊，佢唔會畀5%你啦？但你買股票，我地講嘅10%12%，近乎係童叟無欺，你1萬蚊買SPY，都會拎到10-12%嘅回報。
24. 總之，買樓多餘（但自住可以），買都唔係「因為」估減息佢有得升。做定存更加係多餘。更加唔好討論咩石油黃金（油價跌到呢，仲話中東開戰）。商品之類，個「甚麼是投資」仲未埋尾，到時先講。但結論都寫過，大宗商品，頂多in nominal terms有回報，in real terms都係幾廿年得個桔。而家油價幾多，廿年前又幾多？而美股升咗幾多？廢柴港股都仲有一年3%息畀你丫。你買金條唔會送金花生畀你的
25. 所以，真正值得討論嘅，其實只係得債券同埋股票，真係兩大asset class，但當然我會話你知，都係唔使買債。不過至少債券值得討論下，況且讀者可能都有啲去到五六十歲（我都45囉），退休人士就可能60-40，都要買啲債，所以值得討論下。
Comments
多謝支持，逐樣回復一下： "雖然（部分市場）股市長遠必然有較大增幅，但明顯不是所有市場。" - 我從來冇話係「所有市場」喎。但你講菲律賓，係多數定少數例子？計全球所有股市市值呢？計MSCI World呢？唔係長升咩？而我見菲律賓股市，都明顯高過十幾廿年前。咁定你一定要任何位買都贏錢？咁美股啦，近乎所有位買你今日都贏緊錢。但你都仲要話「都有過迷失十年」，咁即係一定要贏？冇風險又何來有回報？即使美股，都有WeWork啦，但你不能否認成個市場升喎。難道我因為一隻 WeWork，就否定其他升幾倍升幾十倍嘅股票？ "總結我想講，time the market、揀啱股/市係有難度，但明顯係重要" – 從來都冇話唔重要喎，我都寫個股，亦寫過點恐慌時買。但亦寫過實行上嘅種種問題。但點揀股/市？真係咁易事先知道？揀中嘅係叻定好彩？揀錯嘅輸得比「分散」更多，又點計？而你睇「環球股市」，係升多跌少喎。過去幾年，捉得啱2020年3 月或舊年10月瞓身買落去嘅易，定我叫你分段一路保持買貨易？ "你同我講兩百年股市必勝，都被子女埋怨投資錯誤啦。" - 咁事實有幾多個股市要200年？我從來冇講咁長喎。MSCI 最差要坐幾多年？都應該唔使十年。事實係股票一般勝過其他投資，有邊部份錯？咁你要拎「其中一個市場」「其中一隻股票」「其中一段時間」，就冇得講啦。 "就算最可靠嘅美股，都會迷失十年。人生有幾多個十年？" - 咁所以，咪更加要分散。有何不妥？定你要包生仔？會迷失十年，就唔應該長買？我亦寫過，你可以分段，可以分散，可以睇估值。不過實在唔係咁易。 現實係過去N咁多年，一個分散嘅股票組合，絶大多數時間都贏錢，到底有何問題？你既然話認同我主旨，咁其實認同邊部份？唔認同邊部份？我都知低位買中Tesla而家發咗達，咁但你同我冇做丫。係重要架，但點捉？況且，我自己都捉到升10倍嘅股票丫，只係買得唔多。 我寫嘅，全部有歷史數據，點脫離現實？根本你都同意「（部分市場）股市長遠必然有較大增幅，但明顯不是所有市場」。我都同意。到底有何問題？
Ivan，訂閱得閣下文章，小弟當然都欣賞同認同閣下主旨。 雖然（部分市場）股市長遠必然有較大增幅，但明顯不是所有市場。 但先不提買樓槓桿一定比股票大，而且利息成本更低。 但見恒指回到 97年水平，上海同深圳也只有 07 年一半。日經也低走30年。更不要提其他曾經興旺嘅菲律賓、Antwrep 等等股票市場。 同期香港、上海、深圳，樓市都上揚超過一倍。 我假設十年廿年股市**可能**追返，但回歸至今已經近26年，超過大部分人工作搵錢生涯一半。你同我講兩百年股市必勝，都被子女埋怨投資錯誤啦。 總結我想講，time the market、揀啱股/市係有難度，但明顯係重要。就算最可靠嘅美股，都會迷失十年。人生有幾多個十年？ 閣下分享金融知識，固然係重要。但只講 climate 而 ignore weather 明顯係脫離現實。更唔好提，連 climate 都係會變。
