ivanliresearch
patreon
［減息，一樣係買股票］（五，應該完） — 冇錯，減息周期好似債券跑出多啲。但絶大多數時間，都唔係減息周期，亦冇人會話你知幾時完。
🕑 Added 2023-12-01 09:02:14 +0000 UTC之前9次減息周期，債券升足9次，而且幅度唔錯
咁但，我係咪買債？咁都要睇下股票同期回報。但結果，債券都係跑贏嘅
其實有冇諗過，乜嘢叫「減息周期」先？人人講嘅未必一樣
點解減息周期，債券勁，但股票差？
你可以諗下，減息周期最尾，即係發生乜事。
唔係玩嘢：不如諗下，「減息周期」以外，係乜周期？
點解咁重要？因為，「減息周期」，其實只係佔生命好少部份
「非減息周期」，佔生命嘅大部份，而呢啲時間，股票贏到開巷
「咁我減息周期買債咪得，非減息就買返股」
呢篇唔長，亦唔難，但真係爐火純青，你睇晒以前嘅嘢，睇呢篇就易明。唔明嘅，睇多次。呢篇好重要
1. 講咗咁多細節嘢，去到呢度，我地可以真係睇下呢個表。
2. 呢類表，你可能已經見過，一路都會見到，我之後都會探討下。
3. 其實呢類東西，成日出現。Under點點點嘅情況，邊啲嘢會點點點。往往唔係錯，但你點演繹？就小心啲。呢啲表係最基本嘅嘢，你識自己整，或識搵，固然係好。但只係咁係唔夠嘅，仲要知道佢地嘅局限。特別唔好先有結論，然後搵數據支持自己 — 你返工可以咁做，但自己錢就唔好咁
4. 我亦建議你開返我篇信報嘅文嚟睇
之前9次減息周期，債券升足9次，而且幅度唔錯
5. 就咁睇呢個表，冇乜問題丫，照計唔使我點解。就係以往咁多次聯儲局嘅減息周期（特別留意呢四隻字！特別留意呀下！）。然後睇下，債券嘅表現。佢就係用Bloomberg aggregate US Bond Index，實務上即係同隻AGG差不多。最右邊嗰兩行有乜分別？一個係「嗰個周期入面嘅回報」，另一個係「年度化回報」
6. 好啦，基本上都唔使解。次次減息周期，債市都正回報，一次不差，咁仲使問？梗係買債。
咁但，我係咪買債？咁都要睇下股票同期回報。但結果，債券都係跑贏嘅
7. 但你睇咗咁多篇，當然知道故事冇咁簡單。首先第一樣嘢，「正回報」並唔足夠，你做定期都正回報的。問題係，同期股票嘅回報係點？債券好，可能股票更好呢？
8. 表入面只得月份，冇日子，亦因為有啲年代太遠，我懶搵日期。你得閒可以自己計下。但我只用月份去計，大約計到咁嘅東西。
9. 於是你見到，呢啲「減息周期」下，債券回報好 — 唔止，股市回報，普遍都幾差，好似每一次都差過債券
10. 喂，咁仲使問？減息梗係買債券啦。做乜我仲叫你買股票？
11. 呢度就要細心思考了。如果你仲未睇過「排球隊」嘅故事，記得去睇返。
其實有冇諗過，乜嘢叫「減息周期」先？人人講嘅未必一樣
12. 呢度首先問第一個問題，乜嘢叫「減息周期」？你心諗，係咪玩嘢？咁都要問？係喎。咁都要問。唔好以為啲細節唔重要。幾時都要細心。唔同人講嘅「減息周期」，可能根本唔同。最好你自己去verify一次。
13. 幸好，佢有埋月份。上一次減息周期，係2019年8月至到2020年3月。其實即係乜？即係「第一次減息，去到最後一次減息」。你可以對返聯儲局嘅紀錄
14. 咁你小心啦喎，其實，唔一定係咁定義架喎！可能有啲圖，定義做「第一次減息，去到第一次加息」—嘩，咁咪爭好遠！所以，記住知道邊啲位要尋根究底。
點解減息周期，債券勁，但股票差？
15. 我會想你諗兩個問題：第一，點解減息周期之中，債券咁勁，股票多數差？第二，咁減息周期以外，係乜嘢周期？
16. 先討論問題一：減息周期中，往往令到債息大跌，咁債券表現好，好簡單。但點解股票表現唔好？
17. 其實你諗返「減息周期」嘅定義，同埋睇返啲日子，可能都估到。大家仲有記億，對上一次「減息周期」完，2020年3月。發生乜事呀？世紀疫情嘛！所以咪狂減息，減到零，然後咪停。
18. 對上一次呢？「減息周期」幾時完？2008年12月。2008年秋冬發生乜事呀？雷曼爆煲，金融海嘯，所以就減息減到零，然後停。
19. 可以話埋你知，2002年嗰次，都係咁上下。科網泡沫爆破，LTCM爆煲，減息減到零。
20. 你應該見到，有乜共通點？就係，次次都係爆鑊！好合理，年代太遠我唔肯定，但庄少近廿幾年，幾時會減息減到零？當然就係爆大鑊嗰時。
你可以諗下，減息周期最尾，即係發生乜事。
21. 既然係咁，股市梗係唔好啦！一定係爆大鑊，股市最差之時，先會減息減到零嘛！（但當然，唔係話聯儲局「因為」股災所以減息，未必係咁。只係爆得大鑊，股市實大插）
唔係玩嘢：不如諗下，「減息周期」以外，係乜周期？
22. 然後去到第二個問題，你幾乎以為我玩嘢嘅問題：上面講咗「減息周期」，咁請問，「減息周期」以外嘅日子，係乜嘢日子？
23. 有冇人答「加息周期」？錯！至少呢個唔係好嘅答法。
24. 再諗一次，「減息周期」，係第一次減息，到最後一次減息。咁之後，會發生乜事？你過去幾年咪經歷過。之後，往往係一段低息嘅日子。然後，先係開始加息，一路加上去。然後，往住係一段高息嘅日子 — 呢堆嘢，全部都唔係「減息周期」。
25. 換個角度講，有「減息周期」「保持低息嘅時期」「加息周期」同埋「保持高息嘅時間」。上面個表講嘅「減息周期」，亦係好多人嘅定義，你發現，只係包含咗呢四種時間嘅其他一種。所以，「減息周期」以外，仲有好多事
26. 所以，你可以分做四種周期，甚至可以分做三種「減息周期」「加息周期」「不變周期」。你亦可以分做兩種，就只係分「減息」同「加息」 — 例如第一次減，去到第一次加，就係「減息周期」。第一加，去到第一次減，先係「加息周期」 — 一樣得，只係唔係我地上面嘅表嘅定義
27. 所以，點解搞到咁煩？係要咁煩的！因為，啲數可以爭好遠。你睇人地講嘅「減息周期」，同另一個人講嘅，可能根本唔係同一回事！
28. 所以最好方法？自己整！又或者，你要睇得好小心。仲有，睇多啲唔同嘅source：例如我睇一個人話減息周期債券跑出，但另一個話唔係 — 咁，應該係有啲問題。如果係大行或出名作者嘅數，多數唔會「錯」，好可能就係大家定義不同
29. 我話你知，你學曉呢啲嘢，先係最重要。
點解咁重要？因為，「減息周期」，其實只係佔生命好少部份
30. 點解咁重要？因為，「減息周期」，係佔得好短嘅！！！如果你仲記得「排球賽」嘅比喻，就係話你知，「股票跑輸」嘅日子，非常之短。
31. 我地好快睇多次呢個「減息周期」嘅表。9次「減息周期」，夾埋132個月，11年。但，我地由1980年數起嘛，43年前。亦即係話，43年間，得11年係「減息周期」。大多數時間，都唔係「減息周期」
32. 所以你應該問嘅係：在嗰三十幾年「非減息周期中」，又如何？
「非減息周期」，佔生命嘅大部份，而呢啲時間，股票贏到開巷
33. 登登登登，搞咁多嘢，就係為咗最後呢個表。你見到，非減息周期之中，股市表現極之好。甚至未計今次，由2020年3月以嚟（上次「減息周期」完結），美股升咗幾多？我未有實數，但肯定嘅係，債市在呢啲時期，跑輸股票一大截。就2020年3 月到而家，你都見到啲債跌到七彩。
34. 好快sum up一下：冇錯，似乎「減息周期」中，債券跑贏股票，但主要只係因為減息尾段差不多必然係因為爆大鑊。仲有，「減息周期」，在歷史中佔嘅係少時間。而「非減息周期」中，股票跑贏債券好多好多。
「咁我減息周期買債咪得，非減息就買返股」
35. 最最最後，我知你地諗乜。「咁我減息周期時買債，到減息周期完買股，咪得囉」。
36. 理論上，如果啲數字重演，咁好似係得嘅。但實際上我估你都知道問題在邊：我地呢啲分析，係事後去做，事後你咪知幾時第一次減息，幾時最後一次。但在你身當中時，你點會知？
37. 好簡單，邊位話到畀我知，幾時第一次減息？可能下年年中？咁，呢大半年，你做乜好？而你見到，股市已經表現相當好。
38. 不過你可以話，下次減息，就會係「第一次減息」啦，怕且都係。但直到嗰時之前，應該都係買股票。而仲有，雖然你唔會知幾時係最後一次減息 — 佢減到去2厘，我點知係咪會再減？不過，如果減到0，你就真係可以估到應該係「最後一次」。換個講法：到佢減息減到零嗰時，真係應該仆入去買股票。
39. 你睇，2008年尾，同埋2020年3月，事後都見到係好時機。
40. 所以呢？照計而家去到下一次減息，都係應該持有股票。反而下次開始減息時，可能就真係應該減持股票？
41. 應該完，可能下次多一篇補充啲小細節。但即係，「買乜鬼債丫，多餘」
Comments
好文, 學識點睇圖同點去做分析先係最重要
十分好，但跟科氏的「雞蛋理律」一樣很難應用。我見似乎最急跌一段都在減息最後期，相反在減息初期往往更是一段急升，也許是壞消息與貨幣寬鬆的因素互相影響吧。最後一點就是沒有人知道減息終點，如果「零息」沒有出現，就抱著現金遺憾下去了。要是提早入巿，那還是要硬食最後一段急跌了。
